Gen 17 | NdeIBE | STEP | U-Abhrama eseleminyaka engamatshumi aficamunye laficamunye yobudala, uJehova wabonakala kuye wathi, “NginguNkulunkulu uSomandla; hlala usemehlweni ami, ungasoleki.

Genesis 17

Isivumelwano Sokusoka

1 U-Abhrama eseleminyaka engamatshumi aficamunye laficamunye yobudala, uJehova wabonakala kuye wathi, “NginguNkulunkulu uSomandla; hlala usemehlweni ami, ungasoleki. 2 Ngizasiqinisa isivumelwano phakathi kwami lawe, ngandise njalo ubunengi benu.”

3 U-Abhrama wawa wathi mbo phansi ngobuso, uNkulunkulu wathi kuye, 4 “Mina ngokwami ngithi lesi yisivumelwano sami lawe: uzakuba nguyise wezizwe ezinengi. 5 Kawusayi kubizwa kuthiwe Abhrama; ibizo lakho selizakuba ngu-Abhrahama, ngokuba sengikwenze uyise wezizwe ezinengi.

6 Ngizakwenza uzuze inzalo enengi; ngizakwenza izizwe ngawe, njalo amakhosi azaphuma kuwe.

7 Ngizaqinisa isivumelwano sami sibe yisivumelwano sanini lanini phakathi kwami lawe kanye lezizukulwane ezizayo ukuba nguNkulunkulu wakho, loNkulunkulu wezizukulwane zakho ngemva kwakho. 8 Ilizwe lonke laseKhenani, okwamanje ongowezizwe kulo, ngizakupha libe yilifa laphakade kuwe lezizukulwane zakho ngemva kwakho; njalo ngizakuba nguNkulunkulu wabo.”

9 UNkulunkulu wasesithi ku-Abhrahama, “Wena kumele ugcine isivumelwano sami, wena lezizukulwane zakho ezizayo. 10 Lesi yisivumelwano sami lawe lezizukulwane ezizayo, isivumelwano okumele usigcine: Wonke umuntu wesilisa phakathi kwenu uzamele asokwe. 11 Wena kumele usokwe, lokho kuzakuba yisiboniso sesivumelwano phakathi kwami lawe. 12 Okwezizukulwane lezizukulwane ezizayo wonke umuntu wesilisa wenu oselezinsuku ezificamibili kumele asokwe, kusitsho lalabo abazalwa emzini wakho loba abathengwa ngemali emuntwini wezizwe – labo abangazalwa nguwe. 13 Loba bazalwa emzini wakho kumbe bathengwa ngemali, kumele basokwe. Isivumelwano sami enyameni yakho sizakuba yisivumelwano esingapheliyo. 14 Lowo owesilisa ongasokwanga, ongazange ake asokwe enyameni uzakhalalwa ngabantu bakibo; usephule isivumelwano sami.”

15 UNkulunkulu waphinda wathi njalo ku-Abhrahama, “USarayi yena umkakho, ungabe usambiza ngokuthi nguSarayi; ibizo lakhe selinguSara. 16 Ngizambusisa, njalo ngizakunika indodana ngaye. Ngizambusisa ukuze abe ngunina wezizwe; amakhosi ezizwe azavela kuye.”

17 U-Abhrahama wawa wathi mbo ngobuso phansi; wahleka wazitshela wathi, “Kambe indodana ingazalwa ngumuntu oseleminyaka elikhulu na? USara angamzala umntwana yena eseleminyaka engamatshumi aficamunye na?”

18 Yikho u-Abhrahama wasesithi kuNkulunkulu, “Uba nje u-Ishmayeli ubengaphila exhaswe yisibusiso sakho!”

19 UNkulunkulu wasesithi, “Yebo, kodwa phela umkakho uSara uzakuzalela indodana, wena uyibize ngokuthi ngu-Isaka. Ngizaqinisa isivumelwano sami laye sibe yisivumelwano esingapheliyo esezizukulwane eziza ngemva kwakhe. 20 Mayelana lo-Ishmayeli, ngizwile okutshiloyo: ngeqiniso ngizambusisa; ngizamnika inzalo enkulu, ngandise ubunengi bayo. Uzakuba nguyise wababusi abalitshumi lambili, ngimenze abe yisizwe esikhulu.

21 Kodwa isivumelwano sami ngizasiqinisa lo-Isaka, ozamzalelwa nguSara ngasonalesi isikhathi ngomnyaka ozayo.” 22 Eseqedile ukukhuluma lo-Abhrahama, uNkulunkulu wakhuphuka wamtshiya.

23 Ngalonalelolanga u-Abhrahama wathatha indodana yakhe u-Ishmayeli labo bonke abazalelwa emzini wakhe loba abathengwayo ngemali yakhe wabasoka, njengoba uNkulunkulu wayemtshelile. 24 U-Abhrahama wayemdala okweminyaka engamatshumi aficamunye laficamunye mhla esokwa, 25 indodana yakhe u-Ishmayeli ileminyaka yobudala elitshumi lantathu; 26 u-Abhrahama lendodana yakhe u-Ishmayeli bobabili basokwa mhlalokho ngalanga linye. 27 Njalo bonke abesilisa ababesemzini ka-Abhrahama, kugoqelwa labo abazalelwa khonapho ekhaya loba labo abathengwa kwabezizwe, basokwa kanye laye.